VOTER ID vs FACEBOOK PROFILE

C. Lalchhanhima

Cai le ning, kung  hlupui a khung ka. A ma zawng lungthing puitling ngetei pawtah cai hmang a pachia my ca. Chungkua cawng na' pawtah le dangchung cuitei letah hui hratah cinglai khy na' pawtah sawkha rai hui a pachia my ca ka. A ca(Document) puimawpaw vytei cawh thingkawng  taitah law pakhawng ka. Ma ca puimawpaw a hui nalang letah co,  a pacang bang kha lypaw le a rawnah letah a ung bang kha lypaw cawh a meh ta hmu ka. Ama letah lungtlang na rai rai hnuikhy kha be.

            Ca puimawpaw hui cawh a lungthing letah rai rai a nae khy kha be. A pacangnah lungthing letah a tuatu Khazing mo sachianah a va nae ka. Ze na vaitah maw mahra hei ka cang thai?? Cawngsaw hringpaw mahra hei cang tlung bei he??.  ta tah a lungthing letah hming hlupui a pacang  patho my ca. Ma khangtei a lungthing a te tu cawh zehringpaw cang lytah kung pangaw(5) a khung ciapaw  letei  a Voter Id ninglathlaw a hmu na cawtah a cang.

            Khazaw a changchy pawtei a vachuipaw internet letah Facebook profile ninglathlaw a hmangteipaw taco a hmui le sang vytei  mawng sahly thly tha ka. A Voter Id ninglathlaw le A facebook Profile ninglathlaw cawh a ming pakhing khy taitah, tlaipia letah thlalang a pathle thlangpaw letah co ama le ama cawh a ming ka. Lungtlangnah na vytah lungchianah ta a te vy my ca.

            A hmui le sang, a dawngchianah, vytei zawng pacang ka, lungtlangnah hnui a ru a ta ngetei. A hmui le sang letah a lung a tlanglynah hmang pawtah  Khazing lang letah thlawchangnah hnui ka.  Haehrinah a tua patho longmang my ca.

Vy! Khazing ze na vaitah maw ka mehkho he mahrahei na patua thlang??  Ka hnaung he a pazo ka didi  thai? Paming tua, ka hmo a capipaw  le ka haw a kupaw he?  Ka phe he mingtua, ka phe citei zawng a cai caka thlu paw he? Cawngsaw hlupui mahra hei mehkho, Hnakho, hmo le phe hnui tlung bei he??  Ze na vaitah maw ma hra hei ka chiahru paei thai?? a ta khy cang kaw le. A ma letah haehrinah a dawngpaw cawh ningang a chui ta ka.

 “Na mehkho kha va law neh ka, tangka  Rs 50,000 ka ca pe a. Taico, na phekha ca taichung  neh ka, Rs 50,000 ka cabai chi a. Mahluikhung co, na haw kha tlingsathlu neh ka, na dawng cha na’ pawtah Rs 50,000 ka cabai chi vy hui a. Na du maw?? Pachai my ca la khaw??.  Ma natlang cawh a pacang a rung ngetei my ca.

Khazaw letah kaa lungtlang lynah a lo tlang be. Thaikheh hmui le sang na vaitah aa lung a tlang be. Thaikheh hnui le chia na vaitah aa lung a tlang be. Thaikhe chhungkhe khatah a railynah aa hnui na cawtah aa lung a tlang be.
Thaikheh a kawngpacang ngeteipaw khatah aa chai na cawtah he aa lung a tlang be. Thaikheh a hnuirung ngetei na cawtah le tangka aa hnui ngetei na cawtah lungtlangnah hnui paei hlui bei he.  Ze na cawtah Lungtlang lynah le Se pakilynah khazaw a cang cawtah a cang.

Kaa hmui le sang  cawh Voter Id ninglathlaw hratah hmai chiahru hmai my sala, Ama (Khazing) a hme letah co, Facebook Profile ninglathlaw na vytah hmai kaa cha vy syhly he peh. Ze na cawtah A ma a lopaw tah a ma tua na cawtah a cang.  Lungtlang lynah a hnui ngangpaw cang bei pe. Vy, Khazing ka calawng ngetei ta tah a lawngbia hlai vy ri lihe peh.