KEIMAH tih thumal hi..

" Mite'n min chhiar min thlir reng e, kan awmdan zawng zawng an hai lo". Ringtu te kan nun hmandan leh kan ka atanga chhuak thumal hi hman fimkhur a van ngai tak em!! Mizo tawnga thumal(word) tih chu hawrawp te te awmze neia remkhawm hi a ni mai a. Chu thumal chuan thil a tih thei em em a, unau in hmangaih nan leh inlaichin nan hmanraw pawimawh tak siamtu niin tih chhetu pawh a ni bawk. Sawi vek turin leh zia sei turin ka thiamna leh ka finna in tlin lo mahse min puitu leh min fuitu in tam dawn avangin ka rawn au chhuak ve tawp a ni e.

Ka tisual tih ka pha lo; Mite'n  thil kan tihsualin phatna tur kan zawng thin a. Chu chuan mahni thiam kan inchan tir a, kan inlaichinna nun a tichhe bawk, a pawi em em a ni. Chuvangin kan tisual emaw tisual lo emaw pawh ni se, kan nihna dik tak kha zep lovin huaisen takin kan sawi tur a ni. Chu chu puitlingte zia a ni. Mi puitlingte chuan an dikna leh an thiamna ah pawh, “keima thiam loh a ni,” an ti ngam thin.

I tih tha/i thawk tha; Fakna leh fuina tel lo, sawiselna leh zilhhauna chuan mi a siamtha ngai lo. Chuvangin, kan rawngbawlpui, kan thian chu a tih sualah sawisel lovin thil tha zawk hrilh in tanpui i la, a tih thatin i fak thin bawk ang u. Tichuan kan kianga rawngbawl nuam an ti ang a, kohhran in nghahna an ni thui mai ang.

I theih chuan; Sawmna aw mawi, tawngkam hawihhawm hmante hi a lo dawngtu tan a lawmawm chungchuang. Kan rawngbawlpui leh kan thiante chaklohna hriat thiampui a, an thiamthil te, an theih zawng te, huaisen taka an chetchhuahpui theih nan kawng zawna kawhhmuh hi kan tih tur a ni dawn lawm ni?. Chutah chuan hawihhawm takin ‘I theih chuan’ chanvo tantu, solo leh a dangte i nei a nia emaw vawiin, naktuk ah hnatlang min rawn ho dawn nia aw! tiin infui thin i la, hei ai hian kan rawngbawlna hi a chak zawk lovang maw??.

Ka lawm e; Naupangte miin thil an pekin ‘ka lawm e’ ti rawh, tiin kan hrilh thin a. Mahse, a hrilhtute hian he thumal hi kan hmang hreh tlat ni hian ka hre thin a, a pawi hle. Kan ngaisan hnampui zawkten he thumal hi kan hriat angin an hmang nasa hle. Keini paw'n kan inhmangaihna leh kan inlaichinna a lo that zawk theih nan leh kan rawngbawlna kawng a zau zawk theih nan he thumal hi i hmang uar sauh sauh ang u.

Keimahni / Kan; Kohhran leh pawl thil tih reng reng a hian Keimahni / kan tih thumal hi chhuah tam i la, chu chuan member zawng zawng kha a huap a ni. Department hrang hrang leh Local ah thawhhona leh thiltih tur eng emaw a lo awmin kan tel rem chang thei lo a nih pawhin, kan ti tha em? emaw kan kal tha em? ti in zawhna siam thin i la. Chu chuan rinna hmunkhat, baptisma hmunkhat leh kan inpumkhatzia, kan lungrual ziate a tilang ang a, kohhran member te inzawmna a tinghet zawk thin ang.

A tawp ber a tan chuan thumal tawi te; mite rilru leh ngaihtuahna kal tir thui theih em em leh thumal pawimawh lo ber chu KEIMAH tih hi a ni ti i la kan sawisual lo em ang chu maw!! He thumal " KEIMAH " tih hian kan rawngbawlna a tih chak lovin hma min sawn tir theih lo a ni tih hria in kohhran leh pawl ah hian i hmang lo hram hram ang u.