NGAIHTUAHNA TI THUITU

C. Lalchhanhima

20th Feb, 2013 

A bula hmeichhe kal chuan Bible a ken avang leh Biak-in atanga hla vaklo a nih avang chuan inkhawm tur a kal an ni tih hairual a nilo. Chutiang a tumloh deuh a kan intawh thut avang chuan sawi tur a vang ngei mai! Kan in chibai hnu chuan, a nula rawn kalpui chu min hmelhriat tir a. Biak-in kawng a nih avang leh motor te a rawn kal avangin kawng sir remchang lamah chuan in sawn phei in chanchin te kan in zawt zel a. Chuta thil thleng chuan min ti hlauh vin, min va tih thlabar tak em!!!

A hmel leh a taksa han en in mi hrisel tak, sawisel bo, zahpui awmlo tak leh mi puitling tak hi a ni a. Puipun nikhua ah pawh nise, mi langsar tak a nih ka ring. Amah ka biak avang chuan keipawh ka intihtheih phah em em leh nghal a. Chumai chu a la nilo, a hmeichhe rawn kal pui lah sawisel bo, mihring te (a bikin tlangval te) mit pahnih nei zawng zawng duhzawng chu amah (nula) ah chuan awm vek emaw tih mai turin a incheina leh a hmelthatna chuan mi mit hi a la em em ringawt mai a ni. 

A ka atang a thil sen a rawn chhakchhuah chuan min tih hlauh em avang chuan biak dan tur pawh ka hre tawh lo. Chumai chu ni lovin kalkawng chu a ti tawp em em zui leh nghal a. Inkhawm turte an nih mai bakah Chawlhni-te a ni si a, kan bul hnai velah Doctor han ko tur leh damdawiin han panpui turin thil awlsam a ni si lo. Tichuan, ngam leh ngam lo chungin ti hian zawhna ka siam a. Eng nga ti nge damlo chungin i lo inkhawm?? Chhunglam that lohna i nei em ni??

Chu ka zawhna siam chuan a barakhaih-in mak hi a ti em em mai a. Chutih lai chuan, a kut a thil var kai chu mi in bangah hian a han tat a. Chu In neitu te chuan han hmu se'ng, khatiang rawng kha chu kan in cheina atan chuan kan duh em em hran loh an tih lo pawh in, puanchhia leh tui rawn khai chhuak in an sil hrim hrim ang. Chung a thil tih chuan a chhungril nun tur awm ang thlengin ngaihtuahna min neih tir ta a. 

Zawi muangin ka zawhna chu ti hian min chhang a. 'Pathian Khawngaihna zarah damloh-na pakhatmah ka nei lo, ka tha lutuk ringawt. Chuan tunah thisen ang deuh mai ka chhak kha thisen ni lovin" a tih lai takin kan bul ami nula chuan a pawisa ip (purse) atangin engemaw ri hriat theih hi rawn phawr chhuak a. Biak-in chhung lut tur a nia, ka rim tih tui nan Sweet a hmuam a ni ang ti in ka en liam ta mai mai a.

Tichuan, a thilsawi chu a chhunzawm zel a. ‘Englo..... ka KUHVA ei na sen zawk a nih kha’ tiin min chhang ta!!. Ka han en chiang a, a lei leh a ha chu sahel ei ang mai in a la sen zui bawk a. Chuta tang chiah chuan ka bulah ding nula thil ken chu enchian chakna ka neih thut avang chuan ka va melh zawk a. Sweet emaw ka tih kha! sweet ni lovin "Tiranga" hi a lo ni a. Tichuan, damdawi in lam kalpui ngai te kan ni loh avangin Biak-in chhung lamah chuan kan lut ta a.

Tunah zawng chawlhni inkhawm theihnghilh ngai lo te pawhin kan Biak-in chhung ngei ah KUHVA, TIRANGA, KHAINI, adt kan ti tan ta chu nih hi maw!! “....intithianghlim ula, thianghlimin awm rawh u; kei ka thianghlim si a....” (Lev 11:44) ti a min hrilhtu kan Pathian-in a min pek ‘chhiat leh tha hriatna’ kan hman dan hi aw!!! tiin keimah thingtlangpa ngaihtuahna ti thuitu a lo ni ta.!!!