THLEMNA HI RINGTUTE FIAHNA A NI

C Lalchhanhima

Dated: 21st Aug, 2013

30^th June, 2013

Thingtuai leh mau mit la leh ngiltha apiangin hmelma an ngah bik a; thing leh mau ngil lo leh kawisawi apiang hmelma lakah an him duh tlangpui thung. Thing ngil taka ding  hi han kit ila an tlu har bikin, a tluk tawh vek erawh chuan a tlu na nge nge thin. Chubakah a chhemtu thli thawtna lam apiangah an tlu ngei ngei bawk thin. Tlukna tur bik an nei lova, thingkuai erawh a tluk dan tur leh a tlukna tur a hriat sa thung a. A awmhmun a zirin a nghetin a nghet lo ve mai a ni. Ringtu dik takte tan chuan thlemna/hmelma hi a tam bik reng a ni.

Khua a han var tan ta. Hmai pawh phih tha mang hlei lo chuan ka insiam sawk sawk  a. Zinga ka tlanna thin  'NS Palya Park’ (BTM 2nd Stage, Bangalore)  ka pan mek lai chuan kawng sira ka thil hmuh chuan ngaihtuahna tam tak min pe a. Chu chu engdang ni lovin, Zingtin karhnih dawn ka hmuh thin thingkung pahnih zing a pakhat zawk, ngil leh sang, hmunawm ka tih  deuh mai chu a neitu ten thli leh ruah lakah a hlauhawm tiin an in chung zawn velah chuan an rawt/kit  tlat mai a. Pakhat zawk erawh a kuai deuh avang leh a hniam deuh avang chuan a nunna a him phah ta a.

Thingtlanga piang leh seilian tih takah, ka thil ngaihtuahna chuan Primary leh Middle School kan kal lai min ngaihtuah chhuah tir a. Kan hotuten Nilaini tlai (Hnathawh ni) ah 'Thing tuai leh mau sah tur a ni ang a, tuma’n a kawi leh hmantlak loh in sat tur a ni lo' an tih te, mahni huan leh in hungna pal atan thingtuai leh mau kan sah thin lai te, hmeichhe hovin tuahthing atan thing tha leh ngil ngei an phur thinte leh thingzai hovin an thingzai tur atan a ngiltha apiang an thlan thinte min ngaihtuah chhuah tir  zel a. Aw!! Thing leh mau tha apiangin hmelma an ngah bik chu a ni si a le!!

Ngaw chhah tak zingah pawh a ngiltha deuh chu miten an hmuhmaih ngai lo. A tet lai atangin a len thlengin hmanna tur a tam thin em avangin hmelma a ngah bik thin reng a ni. Chutiang chiah chuan, mihringah pawh hian mi fel leh tha nia kan hriatte leh ringtu tha tak nia kan hriatte hi tangkaina an ngah bik rualin thlemna pawh an tawk nasa bik a, miten an nunah beiseina sang tak an nei thin reng bawk a ni.

Mihringte zingah poh khawlai leh huau huauna thil ngainaho aiin Pathian biakbuk ngaina leh tawngtai tamho zingah thlemna a tam zawk a. Kohhranah pawh member satliah ai chuan rawngbawltuten mi sawi leh sel an tawk nasa ngei dawn. Inkhawm satliah ai chuan lamtuala chhuak thin ten an tawk nasa leh ngei dawn bawk. Engvangin nge  mi tha leh fel nia kan hriatten thlemna chu an ngah bik le? E le! Thlemtu Diabola thikthu chhiat duhna zawng tak a nih tlat vang a ni.

Setana hi Thlemna master leh Bumna master  nei a ni a. Thlemna Master nei kawp ngat a ni avangin kan chak lohna lai ber leh mihringte tluk awlsamna ber a hre em em a ni. Pastor, Upa, Rawngbawltute pawh anmahni nihna leh mil tawkin a thlem thin a. Officer leh sawrkar hnathawk pawh anmahni hna a zirin thlemna an tawk zel bawk a. Thalaite zingah pawh tunlai khawvel than dan nen milin kil tin atangin min thlem ve mek zel chu a nih hi maw!!

Thlemna chi hrang hrang, lal duhna, hausak duhna, rawngbawlpuite itsikna, mi bum duhna, eiruk duhna, sum duhna, inngaih duhna, mi dang aia danglam bik nih duhna  adt. kan tawk thin em? Heng thlemna chi hrang hrang leh suala tlukna tura thlemna kan tawh zawng zawng hi thil tha kan tihtheihna hun tha ber leh ringtu tha nih fiahna leh kan dam khawchhuahna tura thil tangkai tak a ni a sin! He famkim lohna khawvela cheng mihringte hi chuan kan do zo lo pawh a ni ang e! Mahse Pathian nen chuan engkim tihtheihloh a awm lova. Isua meuh pawh fiah tuma thlemthluk tumtu diabola khan thlem ngailo zingah min lo dah reng zawk ang tih chu a hlauhawm  zawk hle.

Ringtu tam takten thlemna a chak lutuk a ka hneh thei lo/lo ang tih thinlung kan nei thin. He thinlung hi Setana hnathawh pakhat a ni. Kan thinlung hi Nunna lo chhuahna a nih avangin Setana pawh hian a duh ber thin hi a lo ni a. Setana thlemna kan hriat a, kan mangan lai leh thlemna kan tawh laia chhanhim min huamtu leh thlemna ruala tlan chhuahna kawng min siam saktu Lal Isua hnenah tawngtaiin chu thlemna chu kan hneh zel hi ringtute tihtur dik tak a ni.

Pathian thu chuan, " Mihring tuar theih ang chauh lo chu thlemna reng reng in chungah a thleng ngai lo. Pathian zawng a rinawm a ni, ani chuan in tuar theih tawk aliam chu thlemna in tawh a phal lovang; in tuar theihna turin thlemna rualin tlan chhuahna kawng a siam nghal zawk ang". (1 Korinth 10:13) a tia. Thlemna leh bumna chi hrang hrang kan tawh laiin kan rilru ngaihtuahnaah sualna leh thatnate chu an  insual buan buan thin hi a lo ni a. Chu hun chu a ni dawn lawm ni... Pathianin chhia leh tha hriatna min pek kan hman hun tur leh tlan chhuahna kawng a siam kan zawh hun tur chu(h)..

           Thing leh mau thaten thlemna an ngah ang a, ringtu, nitin darkar tin thlemna tawk thin kan nih chuan Lalpa hnenah lawmthu sawiin tawngtai mawlh mawlh thin ila, chakna thar i dil reng thin bawk ang u. Thing leh mau  kuai leh tha loten thlemna lakah an him duh bik ang mai a, thlemna kan tawk ngailo a nih chuan in ngaihtuah chiang ila, Pathian auin harhchhuah vat kan tum  zok tur a ni. Thlemna hi Ringtute fiahna a ni sia. Thlemna tuar hram hramtu chu a eng a thawl e; fiaha a awm hnuin nunna Lallukhum, Lalpan amah hmangaihtute hnena a tiam chu a hmu dawn si a. (Jakoba 1:12). Lalpa’n malsawm che u rawh se.